Не жетпейді қазіргі адамға бұл?

Деп ойласам оңаша қалғанда бір,

Бәрі бар ғой, айнала толған байлық –

Балаң, қызың, туыстар жаныңда жүр.

Достарың көп, еркінсің қайда барсаң,

Көмектесер жан да көп аура қалсаң.

Өз тірлігің өзіңе байланысты,

Не жақсы, не жаманын таңдай алсаң.

Бір нәрсе жетпей жүр-ау осы бізге,

Іздесем де таппаймын түсіп ізге.

Бәрі бар-ау қарасаң жан-жағыңа,

Бір нәрсе жетіспейді біз бен сізге.

Басқадан бөлектеген адамзатты,

Әлемдегі теңі жоқ ғаламатты,

Көре алмай келемін соңғы кезде,

Адамдар, көрдіңдер ме махаббатты?

Махаббаты анаға, елге деген,

Көрдіңдер ме жүрегі елжіреген?

Бәрі бар-ау біздерде, сол сезім жоқ,

Таба алмадым. біздерден соны іздеп ем...