Жазира, жасыл кілем өрнектеген

Туған жерге, дариға, жер жетпеген!

Кең өлкем, әлдилей бер, сен деп келем,

Аңсап келеп, сағынып шөлдеп келем.

Қайырмасы:

Саумал бұлақ, балдай дәрім,

Салқын самал баурайларым.

Саялаған беу, туған жер,

Сағындырған Саржайлауым!

Армысың, ата-қоныс, жасыл мекен,

Ұланыңмын мен –сенің қасыңда өтем.

Басқаның жерұйығын неғылайын,

Жерұйығым өзімнің қасымда екен!

Қайырмасы

Жадырап, жұтайыншы тау самалын,

Осы еді ғой сағынып аңсағаным.

Гүлдерім, шыршаларым, аршаларым,

Бәріне арнап мен бүгін ән саламын.

Қайырмасы

Жанымды жырға бөлеп таң атырған,

Әнім едің ақ таңда жаратылған.

Төліңнен айналайын жаңа туған,

Айналайын еліңнен дара тұрған.

Қайырмасы