Жүрегімде бір қала бар, Астанам бұл алғашқы,

Тәуелсіз жол кең даламда содан бәрі жалғасты.

Қазақ үшін, халқыма алғаш Тәңір нұрын төгіпті

Бір мен үшін құт қала бар айдай әсем көрікті.

Қайырмасы:

Қызылордам –

Бақыт қонған, бақ дарыған асыл кием,

Ұлы мекен, мәңгі ғұмыр, ғасыр білем.

Қызылордам, Қызылордам –

Мен алдыңда – балаң болып, басымды ием!

Сырдың елі, жырдың елі тұнған қала сезімге,

Қазағымның зиялысы жиналды алғаш өзіңде.

Сырдария толқынында тудым, өстім жаралып,

Жүрегімде бір қала бар, сағынышым – балалық.

Қайырмасы

Сырдариям ағысынан өмірге іңкәр ой алдым,

Қорқыт бабам туған жерде Астанам боп ояндың.

Шалғай жүрсем сағыныштан қайта айналып көретін,

Бір мен үшін құт қала бар, жанға қуат беретін.

Қайырмасы