Аққозы батыр жайлаған,

Тарихқа куә сай-далам.

Егемен елдің бөлшегі –

Құт мекен Қоржын жайнаған.

Ақкөлім қандай шалқыған,

Көгінде қыран қалқыған.

Жомарты жолда отырар

Айналдым ауыл салтынан.

Қайырмасы:

Бақыт та өзің, бақ та өзің,

Жалынды жастық шақ та өзің.

Сағынып жүрек сыздайды,

Көрмесем сені – Аққозым,

Аққозым, менің Аққозым.

Сызылтып қурай, шилері,

Ұзақтың тартса күйлерін.

Ғажайып әсем күйге еніп,

Келеді шалқып билегім.

Қаздармен бірге қаңқылдап,

Өзенді бойлар салқындап.

Ағалар қандай ақжарқын

Алдымнан шығар аңқылдап.             

Қайырмасы

Жақсыбай, Жарлы толқынын,

Анамдай құшып толқыдым.

Аймалап сүйген сәттерім, 

Аңсарым енді сол күнім.

Әдемі әзіл жыр құрап,

Құрдастар күткен шұрқырап,

Жеңгелер жүрер желпініп

Бауырсақ исі бұрқырап.

Қайырмасы