Сарыарқа жерінен,

Семейге келіп ем.

Көрікті жерлерін,

Қызықтап көріп ем.

Суына Ертістің,

Шомылып мен түстім.

Көзіме жағадан,

Ерке қыз сен түстің.

Келбетті сұлуым,

Қазақтың қызының.

Бойыңнан оқыдым,

Сұлулық тізімін.

Ертістің еркесі,

Қасыма сен келші.

Махаббат дертінен,

Тек өзің емдеші.

Жүзіңде әдемі,

Сұлулық әлемі.

Арманым өмірде,

Өзіңдей жан еді.

Көңілдер нұр болып,

Өмірге бір болып.

Ғашықтар шырқайтын,

Қалайық жыр болып.

Сен келші шешімге,

Бірге өмір сүрейік.

Ертіспен Есілде,

Біз бірге жүзейік.

Өзенде жүзгенде,

Қос білек талмасын.

Ертіспен Есілді,

Қос жүрек жалғасын.

Еркесі Семейдің,

Жүр ерте кетейін.

Астана, Есілде,

Мен еркелетейін.

Шуақты күндері,

Жұлдызды түндері.

Астана күтуде,

Табысқан біздерді.

Көрікті сән қалам,

Сүйгендер таңдаған.

Жүректер лүпілін,

Үнемі жалғаған.

Белгілі есімің,

Астана, Есілім.

Ғашықтар тербелген,

Махаббат бесігім.