Сұлу шаһар, ғажап кентім, бақ қалам,

Нұрға бөлеп, берекемді сақтаған.

Талдықорған, ел өзіңмен мерейлі,

Талдықорған, мен өзіңмен мақтанам.

Қайырмасы:

Жетісудың асқақтатар айбынын,

Жанарыңда өзен-көлім, айдыным.

Саған ғашық көк аспанның жұлдызы,

Еркелесең еркелетер ай, күнім.

Шомылдырар жұпарымен даламды,

Шарлар тынбай қызғалдақ жыр ғаламды.

Алатауды алты айналып өтсем де,

Өзге жерге тірей алман табанды...

Қайырмасы

Жер жұмағы – Жетісудың тұмары,

Махаббатым, жүрегімнің жыр-әні.

Мың тамсанып жұтсам саумал ауасын,

Перзентіңнің қана ала ма құмары?

Қайырмасы

Сұлулығың – ару қыздың ажары,

Әппақ нұрың – бақытымның базары.

Талдықорған, елдің сенде ырысы,

Талдықорған, елдің сенде назары.

Қайырмасы