Ауылым – түп қазығым, тірегімсің,

Әрдайым жанымдасың – жүрегімсің.

Балқашқа Жөңке таудан бал сапырып,

Ақсудай арқыраған жыр елісің.

Қайырмасы:

Ауылым – алтын Діңгегім,

Сарқылмас мәңгі жыр кенім.

Өзіңнің арқаң туған жер,

Шаттанып, шалқып жүргенім.

Алыстап арман қуған дүрмекпенен,

Шет жүрсем қадіріңді білмеп пе екем?

Оралған жыл құсындай мекеніне,

Өзіңді алып ұшып іздеп келем.

Қайырмасы

Қызығын қанып ішкен Қызылқайың,

Есіме түссе қалай бұзылмайын?

Қарасу қармақ салған сағындырса,

Шомылып қайтушы едім әр жыл сайын.

Қайырмасы

Қарасай, Қарасырық, Сайжол, Сатан,

Төсіңде түңлік түрген қайран апам.

Тағдырдың тұз бен дәмі біткен күні,

Бауырында төмпешік боп мен де жатам.

Қайырмасы