Домбыра күйге келер бұрауменен,

Келмейді сөз жүйесі құрауменен.

Гүлденген бәйшешектей шіркін жастық,

Келмейді қайта айналып сұрауменен.

Қайырмасы

Он саусағым бір баспай,

Жүрмін қалай жер баспай,

Жиын-тойдың ішінде,

Ән салушы ем осылай.

Мінекей келіп қалдым талай жасқа,

Ағарған нысан кіріп сақал, шашқа.

Отыз бен қырық бестің арасында,

Боп жүрдік сөзім ортақ кәрі-жасқа.

Қайырмасы

Келгенде сөз жүйесі іркілмеймін,

Жорғадай жолға салған бүлкілдеймін.

Келгенде мына жасқа кәрілік жеңіп,

Секілді ақ бас бура күркілдеймін.

Қайырмасы

Сұрасаң төрт момынның жүйрігімін,

Үш жүздің алға ұстаған тұйғынымын.

Баста емес, аяқта емес осы күнде

Ноқтаның жуан сағақ тұғырымын.

Қайырмасы