Батыр да, батыл, ер жүрек қайсар Сақ бабам,

Ерліктің жырын, бірліктің сырын сақтаған.

Көкбөрілердей қасқайып тұрар түркілер,

Даланың заңын, бабаның заңын жаттаған.

Қайырмасы:

Ұрпаққа ұран, мінезі қыран бабамның,

Именбей тұрар алдында асқақ ақ ардың.

Ақтабан болып сақтаған, шіркін, даламның,

Топырағын иіскеп, бойтұмар қылып тағармын.

Мұра қып бізге кең мынау Қыпшақ даласын,

Жігерін қайрап, жасымен жуып жарасын.

Алтын Ордадай алып та хандық құрған ел,

Азия менен Еурапаның арасын.

Қайырмасы

Аштық та көрген, қастық та көрген қайран ел,

Тар жолда тайғақ тағдыры мұзға тайған ел.

Желмая мініп, жерұйық мекен іздеген,

Жауына айбар, досына құшақ жайған ел.

Қайырмасы