Аяулы шағым – жастығым!

Жартасқа шыққан ақ гүлім.

Байлауға келмес тасқыным,

Асығыс жүрген аптығым.

Тіршілігім менің, паңдығым,

Күнәларым мен пәктігім.

Азапқа салған жанды мың

Ащы жасым мен тәтті мұң.

Азапқа салған жанды мың

Махаббат сынды тәтті мұң.

Айласыз кезім еш те бір —

Аяй білмеген ат терін.

Жылаған, күлген кештерім —

Қымбат та қызық шақ керім!

Шымырлай тұнған сезімім,

Шимайға толы дәптерім.

Шыдамсыз кезім, төзімім,

Шындыққа сенген сәттерім!

Шыдамды кезім, төзімім,

Шындыққа сенген сәттерім!

Аяқталмаған соқпағым

Аралау үшін өз елін.

Ақиқат сойылын соққанын

Өртеніп тұрып өзегім.

Тәуекел соңын күтпеген

Албырт та қиын кезеңім!

Арманым, әнім бітпеген,

Асығыс аққан өзенім!