Атам жайлы айтар болсам мен бүгін,

Армандаған өз халқының теңдігін.

Отан үшін жауларымен айқасты,

Ұмытпаймыз қайсарлығын, ерлігін!

Сол соғыстан аман келген атам – ер!

Батырына кең құшағын жаяр ел,

Атын айтып мақтанамыз, ұрпағы,

Аңыз адам, менің атам – майдангер!

Өз елінің мол үмітін ақтаған,

Ұл мен қызын өнегемен баптаған.

Оққа ұшып, опат болған майданда,

Достарына зор құрметін сақтаған.

Менің атам – ер майдангер, сыйлы адам,

Аттамаған адамилық ибадан.

Өз үлесін қосып, жаудан тазартып,

Бейбіт күнді бәрімізге сыйлаған!

Соғыстан соң жұмыс жасап қарқынды,

Елемеген ыстық пенен салқынды.

Төс белгілер – жемісі ғой еңбектің,

Із қалдырдың, дәріптейміз даңқыңды.

Бейбітшілік – от алауы, сөнбесін!

Сұм соғысты, енді елім көрмесін!

Қанын төгіп, жер мен елді қорғаған,

Майдангерлер аты мәңгі өлмесін!