Ақылдылық дарын беріп жаратқан,

Даналықпен елді аузына қаратқан.

Құтым тегі Тілес баба ақылман,

Шапағатын жалпақ жұртқа таратқан.

Ақтарғанда ақыл кенін балқытып,

Тыңдаушысы масаттанар жал бітіп.

Ел таныған ұрпақтары дарынды,

Шабыттанар шаттық әнін шалқытып.

Қайырмасы:

Ел-жұртын барша тең көрген,

Сөзімен жылы дем берген.

Мәнерлеп сөздің нақылын,

Бабамыз Тілес кең төрден.

Қорытып даудың шешімін,

Айтатын нақты кесімін.

Ұрпағы мақтан етеді,

Ақылгөй дана есімін.

Көсем сөзбен әңгімесін бастайтын,

Сабырымен сестіні де жасқайтын.

Ойы өрісті кенен ақыл иесі,

Даукестің де мысын басып тастайтын.

Табиғаты көркем жердің түлегі,

Бәйтеректей өркен жайып түледі.

Өсиетін ұран еткен бабаның,

Ұрпақтары өсіп жатыр жетелі.

Қайырмасы