Нұр шуақты жылу сыйлап көздері

Ойлайтұғын әулет қамын өздері.

Тұнып тұрған  өсиеті аманат

Әжелердің мұра бізге сөздері.

Қайырмасы:

Ақ батасы жүрегінде түзілген,

Мейірімі төгілетін жүзінен.

Әрбір үйдің қазынасы – әжесі,

Біз келеміз әжелердің ізімен.

Жанашыры әкемменен анамның,

Сіздей жанды іздеп қайдан табармын.

Тәрбиең мен өнегелі істерің,

Сақтаулы тұр түкпірінде санамның.

Қайырмасы

Көктен  күннің жылулығын әперер.

Ақ батамен үйге ризық әкелер.

Еркелетіп немерелер өсірген,

Берекесі шаңырақтың әжелер.

Қайырмасы

Әжелердің жолы үлгі біздерге,

Сағынумен бала көңіл іздер де.

Ертегіңді тыңдаушы едік ұйып біз,

Осы әнім тарту болсын сіздерге.

Көп әжелер, кеттіңдер-ау келмеске,

Сіздерменен бірге жүрген шақ есте.

Өмір заңын үйреттіңдер жалықпай,

Соның өзі бізге азық емес пе?