Кемпір:

Тыңдап тұрмын, Алло! Ия! Кім едің?

Шал: Саламат па? Мазалаған мен едім.

Кемпір:

Танымадым, жайыңды өзің айтпасаң,

Беймәлімдеу маған сенің дерегің.

Шал:

Сүйіп қалған жас шақта жайдарлымсың,

Ұмытқам жоқ, әлі де байқармысың,

Көп жігіттің бірімін ғашық болған,

Сендей сұлу, сырымды қайдан білсін?

Кемпір:

Сені енді таныдым замандасым,

Жан едің ғой мен үшін бағаң басым.

Білім ал деп, ата-анам жіберген соң,

Көңіл қалай жігітке алаңдасын?!

Шал:

Жар етуге өзіңді үміттенгем,

Бағым ау деп ойлағам күліп келген.

Қызғанып та жүрдім мен иемденіп,

Саған ғашық боп жүрген жігіттерден.

Кемпір:

Жастық шақты уақыт үптей кетті,

Көп оқумен мақсатқа діттей жеттім.

Махаббатқа тұрақты бола алмадың,

Бітіргенше оқуды күтпей кеттің.

Шал:

Айтқаныңның бәрі рас, білем, шыным,

Іңкәр болған сыртыңнан тілекшіңмін.

Тәкәппар ең, сұлу ең, өжет едің,

Қоя ма деп менсінбей жүрексіндім.

Кемпір:

Қайтем енді ол заман басқа болды,

Білім қуып таңдадым қасқа жолды.

Сен ұнатқан ару қыз сүйтіп жүріп,

Отыз деген бір белес жасқа толды.

Шал:

Білім қуып сен жүрдің алыс жақта,

Жүрегіміз ұнатып таныссақ та.

Жан-жағым да, үйлен деп қоймаған соң,

Бір сұлумен бекіндім табыспаққа.

Кемпір:

Мен де жерде қалмадым, тұрмыс құрдым,

Мамандығым бойынша жұмыс қылдым.

Бойымдағы дарыным ән мен жырым,

Талабымнан жаныма ырыс тұнды.

Шал:

Біліп жүрдім сыртыңнан хәлдеріңді,

Ұл мен қызың кіргізген сәндеріңді.

Тыңдап жүрмін сүйсініп желідегі,

Ел ішіне тараған әндеріңді.

Кемпір:

Тағдырларды бір Алла шешті тосын,

Екі бөлек өмірді кештік сосын.

Болғаныңа  тілекші, ризамын мен,

Ниетіңе мың алғыс, ескі досым.

Шал:

Жан-дүнием серпілді өлеңіңнен,

Әндеріңмен шаттыққа бөлендім мен.

Қартайсақ та жастық шақ ұмытылмас,

Көз алдымда баяғы көркем бейнең!

Кемпір:

Өміріміз алдағы жақсы болсын,

Қайда жүрсең аман бол, ескі досым!...