Көп сыналдың, оған біздер куәгер,

Шырағым боп, менің дәйім тұра бер!

Шапқаныңда, ұл-қызым деп, ой-қырға,

Шаныңа да ілеспейді-ау, Құлагер!

Сендей төзіп тұра алмайды-ау, құба бел!

Дәл сендей болып, төзе алмас, шыдап ер.

Тауқыметті көтереді, бар ана,

Алып тауды көтергендей, мына жер!

Асып түстің қиын асу, көп белден,

Тағдырыңа осы сынақ дөп келген.

Берік болдың, төзімге сен жалғанда,

Кезің де көп кетпен шауып, боқ терген.

Ұсынғанда тағдыр ащы шөлмегін,

Перзент үшін төзе білдің, өлмедің,

Балам, балам деп жүргенде, жүзіңе,

Өмір өзі салыпты-ау, өрнегін!

Артта қалды қиын сәттер, ол күндер,

Келді міне, несібесі мол күндер!

Алдымыздан шығып тұршы үнемі,

Қыздарыңа, бұйырған күн, төркіндер!

Көп сыналдың, оған біздер куәгер,

Шамшырағым болып дәйім тұра бер!

Біз барғанда, қуанып сен жүгірсең,

Шаныңа да ілеспейді-ау, Құлагер!

Ұзақ ғұмыр сүріп, анам, жүре бер!