Ауылым, алтын бесік Балдысуым,

Жап-жасыл, жайқалған шөп, шалғын нуың,

Қыдырып, келсеңіздер, осы ауылға,

Көресіз табиғаттың сұлулығын.

Қайырмасы:

Суын-ай, бұлағының дәмі балдай,

Шіркін-ай бұл өлкенің сәні қандай!?

Ақ көңіл адамдары, дархан пейіл,

Күтетін қонақ келсе, жаны қалмай.

Мыңжылқы, Дегересім, Келіншектау,

Тәрк еткен жаудан келген шабуылды-ау.

Аңыздың қатпары бар қойнауында,

Мүлгиді сыр шерткендей қарт Қаратау.

Қайырмасы

Балдысу, дегендей-ақ суың тәтті,

Өзіңмен өткізсем ғой әрбір сәтті.

Бабамыз Асан қайғы біліп берген,

Өзіңе жарасатын ғажап атты.

Қайырмасы

Балдысу, Қарабұлақ елді мекен,

Шіркін-ай пейіштей бір өлке екен.

Жер бетін шыр айналып іздегенмен,

Табам ба дəл осындай көркем мекен?!

Қайырмасы