Салт-дәстүрдің қалмады сыры ашылмай,

Өз жұртыңның сақталды құны асылдай.

Мұқағали жырлаған ақ кимешек,

Ақ әжемнің сарқылмас мұрасындай.

Қуат алып жазира даламыздан,

Күзетуге дәстүрді саламыз жан.

Аман жетсін ұрпаққа ақ кимешек,

Бізге жеткен аманат бабамыздан!

Қайырмасы:

Аналардың дәстүрмен жаны бірге,

Өзгерген жоқ бұрынғы хәлі мүлде.

Ақ самайын жасырған кимешекті,

Ұмытпады әжелер әлі күнге!

Ұлағатты ұғымның пәк күшіндей,

Сақтай білдік ұятқа дақ түсірмей.

Әжелердің қазір де, ар-намысы,

Кимешектің болып тұр ақ түсіндей.

Ізет кетсе ұлтымнан болар қайғы,

Басқа тәлім бізге үлгі бола алмайды.

Уайымдама О, Мұқа қазақ барда,

Әжең киген кимешек жоғалмайды!

Қайырмасы