Өмір қатал…, ой-сырым баптағаным,

Сабақ болар ертеңге хаттағаным!

Бұл өмірге келгенің адам болып,

О дүниеге бір қадам аттағаның!

Күдер үзбе... кез келсе азатұғын,

Әз жаныңа берер тек, қаза тыным.

Өлең емес бұл өмір, жазғаныңды,

Өңдеп алып көшіріп жазатұғын!

Қайырмасы:

Есігінен екеудің бақ қараған,

Қызыңнан-құт келеді, бақ-баладан.

Өмір жолы тұрары ақ-қарадан,

Өнеге боп келеді Сақ бабадан!

Текке бермес бақытты сұрағанмен,

Дүниені мол етіп құрағанмен.

Шын бақытқа жетуге екеу керек,

Жалғыз өзің қайғыға шыдағанмен!

Ұнатасың жолыңның ақ болғанын,

Әппақтан да жөн болар сақ болғаның!

Әппақ түстер жағымды болғанымен,

Кебіннің сен ескерші, ақ боларын!

Қайырмасы

Пешенеңе жазғанын ұлықтағын,

Жан-жарыңмен тіктелді уықтарың.

Қара түстер жағымсыз болғанымен,

Қағба түсі қап-қара..., ұмытпағын!

Ақ-қараны жеңеді тарынбаған,

Өзің де аман болғайсың, жарың да аман.

Жақын болып жүргейсің, сауапты іске,

Азғана бір ғұмырда жалындаған!

Қайырмасы