Қарлығашым, келдің бе, қаршығадан саумысың?
Аман-есен жеттің бе, айыр құйрық нау-құсым?
Оралдың ба, тағы да өзің өскен ұяға,
Оралдың ба, сүйіктім, екеуің де бармысың?

Қарлығашым, бұл қалай, қайда кеткен серігің?
Зияны жоқ зиялым, өкпелетті сені кім?

Жалғыз қайтты сол жылы, жалғыз қайтты жыл құсым,
Тұмар құсым кеткен-ау тырнағында перінің.

Қарауытып көз алдым, қарап тұрмын досыма,
Қарлығашым, қайта орал мекеніңе, шошыма.
Әжем менің күйбеңдеп, күбірлеп жүр аулада,
О, бәтшағар өмір-ай, өмір дейтін осы да!..

Ол жылы біз ауылда оңаша үйде түрғанбыз
Жаз да өтіп барады, қарлығашым жүр жалғыз,
Көзді ашып-жұмғанша көсеуін ап қолына
Жетіп келді бір күні жел үрлеген сырдан күз.

Ғанибет қой, шіркін-ай, шуылдасаң ұлардай,
Қиын екен жалғыздық қияда өскен шынардай,
Жалғыз қайтты сол жылы, жалғыз қайтты жыл құсы,
Жұмыртқа да таба алмай, балапан да шығармай.