Жерұйығым күнгейде, ауылым-ай,

Амансың ба, ел-жұртым, бауырым-ай!

Жүрек сыздап тулайды сағыныштан,

Алпыс екі бойдағы тамырымдай.

Қайран менің, Майлы мен Барлығым-ай,

Жәркен боздап сағынған, Жәйірім-ай!

Күнгейіңнен күн шықса, тағатым жоқ,

Алып ұшып баратын, ауылым-ай.

Қайырмасы:

А-а-ай, туған өлкем-ай,

Сені қиып көш керуен, көшпен кеткем-ай.

А-а-ай, туған өлкем-ай,

Сағынышым тарқамай жүрмін қалқам-ай

Сағыныш-ай, ауылға, сағыныш-ай,

Қиып кеткен жанашыр, жақыным-ай.

Бір туса да анадан, бір болмайтын,

Жазып қойған маңдайға, жазмыш-ай.

Қасиетім, Қарағай бастауым-ай,

Сенде өткен бал дәурен, жас шағым-ай.

Айлар аунап, жылыстап, жыл өтсе де,

Сағынышым қоймады, бір басылмай.

Қайырмасы