Кешірдім,

Кешірем бәрін де,

Кешірім бар менде әлі де.

Кектеніп, кесірге бармаппын

Көрместей болсам да әлі де.

Кешірем,

Кесірлі жанды да,

Кешірім тазартар арды да.

Кешірдім, аяқтан шалғанды

Кешірдім қызғаншақтарды да.

Күрсіндім демеймін өкпеден,

Кешірім сұрама тек менен.

Кінәдан пәк қыла кешірдім

Керіліп несіне кектенем.

Кінәсіз, күнәсіз пенде жоқ,

Кінәні жасырмас перде көп.

Кең болсам, кемігіп қалмаспын

Көкірек керу де менде жоқ.

Кешірім мейірім бастауы,

Кешуге шақырам басқаны.

Кісілік жасайық кем күнде

Кек деген ұмытып қасқаны.

Кісінің күні де кісімен,

Кәрі деп, болмейік кіші ме ең.

Кешірім жасаған кісінің

Көркемдік көрінер ісінен.

Көңілдер тек сонда тазарар,

Кешірім жүректі тазалар.

Кек толса кірлейді жүректе

Кірлесе кесірмен азады ар.

Кінәмшіл болмайық адамдар,

Кешу мен басталсын қадамдар.

Кешірер Алла да күнәңді

Кешіре бәріне қараңдар...