Сен қайтқан күн шаңырақтан нұр көшкен,

Балалықтың базары да бірге өшкен.

Жеті бала жетім қалған артыңда,

Бір-біріне сүйеу болып бірге өскен.

Біз есейдік абыройыңды төкпедік,

Ешбір ала жіптен  аттап  өтпедік.

Үйлі-жайлі, ұрпақты боп анашым,

Өзің берген тәрбиемен көктедік.

Қайырмасы:

Елестейсің алыс қалған күндердей,

Түсіме де жүрсің ана-ау бір келмей.

Ризашылық айта алмадым тіріңде,

Бір көйлек те кигізуге үлгермей.

Сағынышпен өтті түнім, күнім де,

Айтылмаған мың алғысым тілімде.

Ұл қыз сүйіп, немерелер өсірген,

Балғын қызың әже болды бүгінде.

Әз атыңды тербетемін ән қылып,

Естелігің санамда тұр жаңғырып.

Сенің бейнең ұмытылмас анашым,

Сақталады жүрегімде мәңгілік.

Қайырмасы