Өмірді сүйем, түңіліп кейде кетсем де,

Өмірді сүйем, беріліп мұңға шөксем де.

Өмірді сүйем, армандарымнан адасып,

Мақсаттың сан мың азына ғана жетсем де.

Қайырмасы:

Өмірді сүйем, күндерге алғы қарайлап.

Өмірді сүйем, бұйыртпаса да сарай бақ.

Өмірді сүйем, жетсе деп қолым бақытқа,

Шаттық күн мүмкін алдымнан атар арайлап!

Өмірді сүйем, кетсем де кей сәт мүжіліп.

Өмірді сүйем, тұрмағанымен түзіліп.

Өмірді сүйем, болса да жолым тым ауыр,

Қырқылып қиял, үміттерім мол үзіліп.

Қайырмасы

Өмірді сүйем, ішіме сақтап сырымды.

Өмірді сүйем, кешсем де ырың-жырыңды.

Өмірді сүйем, өтірік жұртқа күлімдеп,

Жасырып қалып екінші мұңды қырымды.

Қайырмасы