Оу, қазағым өркен жайған, кезеңмен,

Әлі талай өркендейсің, сезем мен!

Қасиетін, жыр қылайын қамшының,

Қазағыма серік болған ежелден!

Қазақпенен байланысты бар сыры,

Түсінеді, нағыз қазақ жан мұны!

Ей, жігіттер бағалаңдар төрге іліп,

Сегіз өрім, тобылғы сап қамшыны.

Қайырмасы:

Қамшыны бас аламанда, ар үшін,

Бәсеңдетпей сал күреңнің шабысын!

Бабалардан мұра болған киелі,

Әрбір жігіт, бағаласын, қамшысын!

Қанша түрмен түрленсе де өлшемі,

Орға жықпас ей, азамат ол сені.

Ат үстінде қамшы болсын қолыңда,

Ер-тұрманның ажырамас бөлшегі!

Салт дәстүрге болмас, сірә, бағынбай,

Қастерлеңдер, көздің қара, ағындай!

Қасиетін бағалаңдар қамшының,

Өмір қысқа сол қамшының сабындай!

Қайырмасы