Сағынып жүрмін бауырым,

Нөсерлі мерзімді ақ жауын.

Тербелген жал-жал толқындай,

Бел-белес қырқалы ауылым.

Сағынып жүрмін, туысқан,

Сәлем сөз жолдап, алыстан.

Бір жүріп өскен ауылда,

Бірге ойнап күліп алысқан.

Қайырмасы:

Сағындым, сағындым сені,

Бал-бұлақ, қоғалы көлді.

Шалғынды шайқаған желі,

Аптапта ойнаған сағым,

Шағыл, сор, саз, тақыр жері.

Сағындым, сағындым елді,

Сағындым туған жер сені.

Қонысын елім жырлайын,

Сағыныш әнім жолдайын.

Сай-сала, жыра, жықпалда,

Әніме арқау әрдайым.

Тайсойған, Нарынды аралай,

Ақ Жайық жағаң жағалай.

Сағыныш саз, самал өбер,

Еркелеп ерке баладай.

Қайырмасы

Сағындым барша жамағат,

Талқыдан жүрер қорғалап.

Сағындым сіздерді ағалар,

Сүрінсем тұрар қаумалап.

Жымиып кербез керілген,

Назданып ерін шүйірген.

Сағындым құрбы, жеңгейлер,

От сепкен бота көздерден.

Қайырмасы