Сағынамын туылып өскен жерді,

Із қалдырған балалық көштен белгі.

Сағынамын ақ жүрек жайсаңдарым

Ақ пейілмен мейірім төккендерді.

Сағыныштың өзегі уақытта екен,

Сағынатын  ауылым бақыт мекен

Туған жерді сағыну бақыт болса

О, Тәңірім онда мен бақытты екем.

Ізгіліктен бойтұмар таққандарды,

Иман нұрын кеудеге жаққан жанды

Сағынамын көз көрген ауылдасты

Жанарыннан жылуын шашқан мәңгі.

Ауыл маңы көк майса жасыл желек

Әсемдігі жаныма әр күн медет.

Күн көзінен нәр алған табиғаты

Сағыныштың әніне алсын бөлеп.