Ісің түскен адамнан ар таймасын деп тіле,

Адалынан, антынан жар таймасын деп тіле.

Үмітің мен арманың ортаймасын деп тіле,

Тірлігіңде көңілің қартаймасын деп тіле.

Балаларың өзіңнен оза жүргей деп тіле,

Дүниеде ғұмырың таза жүргей деп тіле.

Бас ауырып, балтырың сыздай қалар сәт туса

Туған жердің ауасы жаза жүргей деп тіле.

Жаны ұйқыда нәндердің тоңа жүргей деп тіле,

Бір ізгілік бойына қона жүргей деп тіле.

Жақ-жақ болмай қазағың, оңа жүргей деп тіле,

Түйсігінен рушылдық маңа жүргей деп тіле.

Мәртебесі Отанның өсе бергей деп тіле,

Берекелі ғұмырға көше бергей деп тіле.

Ел тағдырын даналар шеше бергей деп тіле,

Халқың қызық күндерді кеше бергей деп тіле.