Шетінен қайсар қылық, батыр қаған,

Елі үшін отқа күйіп лапылдаған,

Жат біреу жау ниетпен жерін басса,

Тымағын баса киіп, тақымдаған,

О, менің батыр бабам!

Қайырмасы:

Көшсе де жерден жасыл шатырлары,

Ізі мен оғы жатыр тақырда әлі,

Уақыттың дауылында ұрпағына

Елдіктің жолын сілтеп жатыр бәрі –

Қазақтың батырлары!

Дауылды дариядай жатыр ғалам,

Ғаламның сырын байқап ақын да алаң.

Тылсымда талмаусырап бара жатсам,

Намыстың отын жағар атың маған,

О, менің батыр бабам!

Қайырмасы

Ірітсе іркітімді ірі заман,

Кеш мені – үні майда, жыры жалаң!

Күмбірлеп аруағыңа сиынам да,

Қаныма атой салар жылу алам,

О, менің ұлы бабам!

Қайырмасы

Жанына қуат құйып жайсаң далам,

Ханның да қаһарынан тайсалмаған,

Көз ілмей жерін қорғап, елін қорғап,

Тау асып, сай шарлаған,

О, менің қайсар бабам!

Қайырмасы