Мың құбылған қуаныштан, дерттерден,

Қиын не бар адам жанын зерттеуден?

Мен келемін өз жанымды зерттеумен,

Бірде аяз, бірде жалын, өрт кеудем.

Арзан не бар ойнау менен күлуден,

Қымбат не бар, адам сырын білуден?

Мен әуремін, өз сырымды білумен,

Кеше бұзып, өкінемін бүгін мен,

Қайырмасы:

Жылдар бойы бірге жүріп, бір күлген,

Жақыныңның жат боларын кім білген.

Адамдарды зерттей алмай жүрмін мен,

Оны зерттеу мүмкін емес, білдім мен...

Адамдардың жаны менен жүрегін,

Ойлайтын ем, бір кісідей білемін...

Ажырата алмай шуақ, түнегін,

Танығанға мәз болыппын реңін.

Ертең басқа, бүгін жақсы көргенім,

Өз көзіме өзім, ғажап, сенбедім.

Кесірткедей ауыстырған өңдерін,

Түсінбеймін қылығына пенденің.

Қайырмасы